Dahil sa naitalang kaso ng Dengue sa ilang barangay sa bayan ng Calaca, pinangunahan ng Tanggapan ng Pambayang Kalusugan ang pagsasagawa ng Deng-Get Out, isang Search and Destroy Operation kontra Dengue noong buwan ng Nobyembre at Disyembre.
Ang aktibidad ay tugon din sa posibleng pagtaas ng kaso ng Dengue Fever dulot ng mga pagbaha at pag-ipon ng tubig dahil sa sunod-sunod na pag-ulan.Tinunton at sinira ng mga kawani ng nabanggit na tanggapan ang mga lugar na maaaring pamugaran ng lamok na Aedes Aegypti na siyang may dala ng dengue virus.
Nagsagawa rin ng misting operation sa mga sumusunod na barangay: Coral ni Bacal, Lumbang na Bata, Dacanlao, Lumbang Calzada, at Poblacion 6 upang mapigilan ang anumang banta ng outbreak.
Tinalakay din sa mga residente na panatilihing malinis ang kanilang bahay at kapaligiran upang maitaguyod ang kalusugan ng kanilang mga pamilya laban sa banta ng Dengue.
